રમેશ સવાણી, I.P.S.

જાદુઈ કાળી કામળી!

જાદુઈ કાળી કામળી!

–રમેશ સવાણી

તારીખ 10 ડીસેમ્બર, 2009ને ગુરુવાર. સમય સવારના અગીયાર વાગ્યાનો. સ્થળ : દાહોદ જીલ્લાનું હીરોલા ગામ. હજારો માણસોનો મેળો ભરાયો હતો. લોકો દુર દુરથી મોટી આશા સાથે આવ્યા હતા. જીપ અને છકડા રીક્ષામાં માણસોનું ભરોટું ભર્યું હોય તે રીતે સૌ આવી રહ્યા હતા. સાઉન્ડ સીસ્ટમમાં ડાકલાં અને સંગીતનો પ્રવાહ વહેતો હતો. શ્રીફળ, અગરબત્તી, ફુલ અને ખાણીપીણીનું બજાર ઉભું થઈ ગયું હતું. સર્વત્ર ધાર્મીક માહોલ દેખાતો હતો.

લોકો અહોભાવથી ચર્ચા કરતા હતા : “બાપુમાં માતાજી બીરાજે છે! બાપુ ચમત્કાર કરે છે!’’

“બાપુ લકવાગ્રસ્તને દોડતો કરે છે! અપંગને સાજા કરે છે! શારીરીક–માનસીક બીમાર લોકોને ચપટી વગાડતા જ સારા કરે છે!’’

“બાપુની કાળી કામળી જેના માથા ઉપર ફરે તેનો બેડો પાર થઈ જાય!’’

“આ બધું જાદુઈ કાળી કામળી કરે છે! પન્દર–વીસ વરસથી જેના ઘરે પારણું નહોતું બંધાયું ત્યાં બાપુની કાળી કામળીના પ્રતાપે પુત્ર–જન્મ થયાં છે! કાળી કામળી તમારા માથા ઉપર ફરે ત્યારે તમે જે ઈચ્છો તે થાય જ!’’

“દવાખાનામાં જવા છતાં રોગ મટ્યા ન હોય તેવા રોગ બાપુ તાત્કાલીક દુર કરે છે! ડૉકટર નીષ્ફળ ગયા હોય તેવા કીસ્સામાં રોગીઓના દર્દ બાપુના સ્પર્શ કરવાથી જતાં રહે છે!’’

“હજારો લોકો એકઠાં થાય છે. રાજકીય નેતાઓ, અધીકારીઓ બાપુના આશીર્વાદ માટે તલસે છે. લોકો કલાકો સુધી લાઈનમાં ઉભા રહે છે, છતાં વારો આવતો નથી! જે લોકો આશીર્વાદથી વંચીત રહી ગયા હોય, તેઓ બાપુના બીજા દરબારની રાહ જુએ છે! કેટલાંક લોકો બાપુના ચાર–પાંચ દરબારમાં જાય છતાં વારો આવતો નથી! બાપુ એક અને આશીર્વાદ ઈચ્છુકો લાખો અને કરોડો!’’

“બાપુ મહાન છે. કોઈની પાસેથી રુપીયા માંગતા નથી!’’

“બાપુ તો સમાજસુધારક પણ છે. દારુમુક્તી અને દહેજમુક્તીની વાતો કરે છે!’’

“બાપુ સંત છે! ધાર્મીક સંસ્કારોનું સીંચન કરે છે! બાપુ મહાન માનવતાવાદી છે!’’

“બાપુ દુઃખી ગાયોનાં રક્ષક છે. દસ એકર જમીનમાં ત્રણ હજાર દુઃખી અને રોગી ગાયો રહી શકે તેવી ગૌશાળા ઉભી કરીને બાપુ પ્રચંડ ધર્મકાર્ય કરી રહ્યા છે!’’

“લીમખેડા તાલુકામાં બાપુનો આશ્રમ છે, ત્યાં ભક્તજનો માટે રહેવાની અને જમવાની વ્યવસ્થા છે. લોકસેવામાં બાપુથી આગળ કોઈ નથી!”

હીરોલા ગામ આજે ભાગ્યશાળી બન્યું હતું. બાપુની પધરામણી ગામમાં થઈ હતી. બાપુની પધરામણી માટે પાંચ વર્ષ સુધી જુદા જુદા ગામ–સ્થળનું બુકીંગ થઈ ગયું હતું! બાપુની પધરામણી સર્વરોગ સારવાર કેમ્પ બની જતો. સર્વ ઈચ્છાપુર્તી દરબાર બની જતો! બાપુના સેવકો ગૌશાળા માટે ફાળો એકત્ર કરવામાં મસ્ત બની જતા!

બાપુ પોતાના માથા ઉપર જાદુઈ કાળી કામળી ફેરવે તેની દુઃખી, અપંગ, બીમાર લોકો પ્રતીક્ષા કરી રહ્યા હતા. ડાકલાં અને સંગીતનો ધમધમાટ ચાલુ હતો. લોકો શ્રીફળ અને અગરબત્તી લઈને બાપુના ચરણસ્પર્શ કરી રહ્યા હતા.

સાંજના ચાર વાગ્યા. દુઃખી લોકોની લાઈન હજુ લાંબી હતી. એક મોટો ટ્રક ભરાય તેટલાં શ્રીફળનો ઉંચો ઢગલો થઈ ગયો હતો. બાપુને આશીર્વાદ આપવાનો થાક લાગ્યો ન હતો, તેઓ બમણી  ઉર્જાથી દુઃખી લોકોના માથા ઉપર કામળી ફેરવી રહ્યા હતા.

અચાનક બાપુની આંખો પહોળી થઈ ગઈ. એક લકવાગ્રસ્ત જુવાન બાપુના પગમાં ઢળી પડયો. બાપુએ ત્રણ–ચાર વખત તેના માથા ઉપર કાળી કામળી ફેરવી પણ જુવાન હલ્યો નહીં. જુવાન બેહોશ હતો. બાપુ જુવાનને પોતાના પગ પાસેથી દુર ખસવા કહેતા હતા પણ જુવાન સાંભળવાની સ્થીતીમાં ન હતો. બાપુને ગમ્ભીરતાનો ખ્યાલ આવી ગયો. ઉહાપોહ થાય તે પહેલાં, સર્વરોગ સારવાર કેમ્પ પુરો થાય છે અને હવે પછી જ્યાં કેમ્પ યોજાય ત્યાં દુઃખી લોકોએ હાજર રહેવું, તેવી બાપુએ જાહેરાત કરી.

એક અખબારમાં જાદુઈ કાળી કામળીના સમાચાર પ્રસીદ્ધ થયા. સામાન્ય રીતે આવા સમાચારો વાંચીને લોકો નજર ફેરવી લેતા હોય છે. કોઈ નીસ્બત ન હોય તે રીતે! પરન્તુ ગોધરાની એક સંસ્થા હ્યુમેનીસ્ટ રૅશનાલીસ્ટ એસોશીયેશનના હોદ્દેદારોને આ સમાચારે વીચારતા કરી મુક્યા.

હ્યુમેનીસ્ટ રૅશનાલીસ્ટ એસોશીયેશન, ગોધરાના પ્રમુખ મુકુન્દરાય કરસનદાસ સીંઘવે(સેલફોન : 90332 06009)  તારીખ 12 ડીસેમ્બર, 2009ના રોજ તબીબી ડીગ્રી વગર કાળી કામળીવાળા બાપુ શરીરનાં તમામ રોગોની સારવાર કરે છે, તેથી ગુજરાત મેડીકલ પ્રેકટીશ્નર ઍકટ 1963ની કલમ : 34 હેઠળ કાળી કામળીવાળા બાપુ સામે ગુનો દાખલ કરવા માટે દાહોદના પોલીસ વડા તથા કલેકટરને ફરીયાદ કરી. દસ દીવસ થયા છતાં પોલીસ તરફથી કોઈ કાર્યવાહી ન થઈ હોય, મુકુન્દરાયે તારીખ 22 ડીસેમ્બે, 2009ના રોજ રાઈટ ટુ ઈન્ફોર્મેશન ઍકટ, 2005 હેઠળ જીલ્લા પોલીસ વડાને એફ.આઈ.આર.ની નકલ આપવા માટે અરજી કરી. પોલીસ મુંઝાણી. આ પ્રકારનો ગુનો અગાઉ દાખલ થયેલ ન હતો. જીલ્લા પોલીસ વડા ડૉ. વીપુલ અગ્રવાલ હતા. તેઓ તબીબી ડીગ્રી ધરાવતા હતા. તેમના ધ્યાને આ બાબત આવી. તેમણે ગુનો દાખલ કરવા સુચના કરી. તારીખ 28 ડીસેમ્બર, 2009ના રોજ ઝાલોદ પોલીસ સ્ટેશનમાં કાળી કામળીવાળા બાપુ ઉર્ફે ગણેશ દેવાભાઈ ભરવાડ (ઉમ્મર : 34) સામે પોલીસ સબ ઈન્સ્પેકટર પી. એમ. રાઠોડે ગુનો નોંધી તપાસ હાથ ધરી.

ગુનો દાખલ થતાં જ બાપુ ચોકી ગયા. તેમણે ભક્તજનોને કહ્યું : “આ તો અપમાન કહેવાય! આનો વીરોધ થવો જોઈએ. ખોટી ફરીયાદ કરનાર મુકુન્દરાય સામે ગુનો દાખલ કરી તેને જેલમાં પુરવો જોઈએ! હવનમાં હાડકાં નાખનારાઓ રાક્ષસ કહેવાય. મુકુન્દરાયને પકડીને મારી પાસે લાવો. એના માથા ઉપર કાળી કામળી ફેરવીને એને કાયમ માટે મુંગો કરી દઈશ!’’

બાપુના ભક્તજનોની વીશાળ સંખ્યા જોઈને, એક રાજકીય પક્ષના હ્યુમન રાઈટ સેલ, ડૉકટર સેલ અને લીગલ સેલના કાર્યકર્તાઓએ દાહોદમાં તારીખ 24, ફેબ્રુઆરી, 2010ના રોજ રેલી કાઢી જીલ્લા પોલીસ વડા તથા કલેકટરને આવેદનપત્ર આપ્યું : “બાપુ કોઈ સારવાર કરતા નથી, દવા આપતા નથી. શ્રદ્ધાથી રોગમુક્તી કરે છે. કોઈ વળતર લેવાતું નથી. જેથી કલમ–34 મુજબ ગુનો બનતો નથી. બાપુ સામેના ગુનામાં ‘બી’ સમરી ભરો અને ખોટી ફરીયાદ આપનારને જેલમાં પુરો! બાપુ દારુમુક્તી, દહેજમુક્તીનું કામ કરે છે. ધાર્મીક સંસ્કારોનું લોકોમાં સીંચન કરે છે. એની સામે ખોટી ફરીયાદ સાંખી લેવાશે નહીં! રાજસ્થાન, મધ્યપ્રદેશ અને ગુજરાતના દુઃખી લોકોનું આ અપમાન છે. બાપુ સાચા લોકસેવક છે!’’

બાપુના સર્વરોગ સારવાર કેમ્પ ચાલુ રહ્યા. ભક્તજનોની વીશાળ સંખ્યાને કારણે બાપુ સામેના ગુનાની તપાસ ધીમી ગતીએ ચાલુ હતી. ફરીયાદી મુકુન્દરાય ઉપર ફરીયાદ પાછી ખેંચવા દબાણ શરુ થયું. તેમને ધમકીઓ મળી. ગુજરાતમુંબઈ રૅશનાલીસ્ટ એસોસીયેશનના પ્રમુખ પ્રોફેસર અશ્વીન કારીયા(સેલફોન : 93740 18111) તથા લોક વીજ્ઞાન કેન્દ્રના પ્રમુખ ડૉ. સુજાત વલી(સેલફોન : 99794 22122)એ જીલ્લા પોલીસ વડા, કલેકટર, ગૃહ સચીવ અને રાજયપાલશ્રીને આવેદનપત્ર આપ્યું : “અન્ધશ્રદ્ધા ફેલાવનાર બાપુ સામે તાત્કાલીક પગલાં ભરો, બાપુ ગંભીર બીમારીવાળા લોકોને ખોટો વીશ્વાસ અપાવી છેતરે છે. જાદુઈ કાળી કામળીનાં ભરોસાને કારણે ઘણાં લોકોના મૃત્યુ થશે! બાપુના કાર્યક્મના સ્થળે વીશાળ જનમેદની ઉમટે છે. કેટલાય માર્ગ અકસ્માત થયા છે. કાર્યક્રમના સ્થળે પોલીસ બંદોબસ્ત હોય છે. નાગરીકોની સુરક્ષાના બદલે પોલીસ, અન્ધશ્રદ્ધાના પોષક કાર્યક્રમનો બંદોબસ્ત કરે છે, તે જરા પણ ઉચીત નથી. બાપુના કાર્યક્રમના બંદોબસ્તમાં રોકાયેલ પોલીસનો ખર્ચ સરકાર શા માટે ઉઠાવે છે?’’

 


(આવી છેતરામણ થઈ હોય તો, પુરતા પુરાવા સાથે,હ્યુમેનીસ્ટ રૅશનાલીસ્ટ એસોશીયેશન’, ગોધરાના પ્રમુખ મુકુન્દરાય કરસનદાસ સીંઘવ(સેલફોન : 90332 06009) તેમ જ મારા ‘અભીવ્યક્તી’  બ્લોગના https://govindmaru.wordpress.com/cck/  પેજ પર ગુજરાત રાજ્યના 12 કેન્દ્રો અને તેના કાર્યકરોના સેલફોન નમ્બર આપવામાં આવ્યા છે તેઓનો સમ્પર્ક કરવા જણાવાય છે.  …ગો. મારુ)


 

જાગૃત નાગરીકોએ જીલ્લા પોલીસ વડાની કચેરીએ ધરણાનો કાર્યક્રમ યોજવાનું નક્કી કર્યું. બીજી તરફ બાપુના સમર્થનમાં ભકતજનો મેદાને પડયા. ગુજરાત, રાજસ્થાન અને મધ્યપ્રદેશમાં જાદુઈ કાળી કામળી, ચર્ચાનો મુદ્દો બની ગઈ! બાપુ બમણા ઉત્સાહથી સર્વરોગ સારવાર કાર્યક્રમ જુદા જુદા સ્થળોએ યોજતા હતા. ભક્તજનોની તાલાવેલી અને બાપુની પ્રચાર ઝુમ્બેશના કારણે જાગૃત નાગરીકોનો અવાજ દબાઈ ગયો!

કેટલાંક ભકતજનોએ ફરીયાદી મુકુન્દરાયને ઘેરી લઈ ફરીયાદ પરત ખેંચવા એફીડેવીટ કરાવી લેવાનું આયોજન કર્યું. જો ફરીયાદી તૈયાર ન થાય તો તેના હાથ–પગનો ભુક્કો કરવાનું પણ નક્કી કર્યું. તારીખ, સમય અને સ્થળની પસન્દગી થઈ.

દરમીયાન તારીખ 7 એપ્રીલ, 2010ને બુધવારના રોજ, સવારના 11:00 વાગ્યે જીલ્લા પોલીસ વડાની કચેરીએ એક મહીલા ચાર નાની બાળકીઓ સાથે રજુઆત કરવા પહોંચી. તેનું નામ હતું રાજીબેન ભરવાડ(ઉમ્મર : 32). તેની રજુઆત સાંભળીને પોલીસની ઉંઘ ઉડી ગઈ. રાજીબેને કહ્યું : “સાહેબ! મારી દીકરી સપના (ઉમ્મર : 06), દેવલ (ઉમ્મર : 05), સીંદુરા (ઉમ્મર : 04) અને પાયલ(ઉમ્મર : 07 મહીના)ના પીતા કાળી કામળીવાળા બાપુ છે! હું તેમની પત્ની છું! મારા પતી મને છોડીને, અહીં તાન્ત્રીક વીધી કરીને લોકોની આંખમાં અને મગજમાં ધુળ નાખે છે! મારા પતીને દીકરો જોતો હતો, એટલે મને મારઝુડ કરતાં હતા. તેણે બીજા લગ્ન મુમ્બઈની સુનીતા સાથે કર્યા હતાં અને હાલમાં શીલ્પાને સાથે રાખે છે. એને જેલમાં પુરો, એની જાદુઈ કાળી કામળીમાંથી હવા નીકળી જશે! સાહેબ! એ પૈસાના ભુખ્યા છે, એટલે લોકો સાથે ઠગાઈ કરે છે!”

બીજા દીવસે અખબારોમાં રાજીબેનની વ્યથા પ્રસીદ્ધ થઈ. બાપુના ભક્તજનો ઉપર વીજળી પડી હોય તેવો માહોલ બની ગયો. બાપુએ પોતાના કાર્યક્રમો મોકુફ કરી દીધા! જાગૃત નાગરીકોને મોટો પુરાવો મળી ગયો.

ચાર મહીના બાપુ એકાંતવાસમાં જતાં રહ્યા, પરન્તુ પાંચમા મહીને બાપુએ સર્વરોગ સારવાર કાર્યક્રમની શરુઆત કરી દીધી. ભક્તજનોની સંખ્યા ઘટવાને બદલે વધી ગઈ! ઘુંટણનો દુખાવો કાળી કામળી ફરતા જ દુર થઈ જાય છે, એવો પ્રચાર જોરશોરથી ચાલુ કર્યો!

તારીખ 16 જુન, 2011. સાંજના પાંચ વાગ્યા હતા. પેરોલફર્સો સ્કવોર્ડના પોલીસ સબ ઈન્સ્પેક્ટર બી. કે. ખાંટ અને તેમની ટીમ ગોધરા–દાહોદ હાઈવે ઉપર ઓરવાડ ગામ નજીક વૉચમાં હતા ત્યારે એક કાળા રંગની કારને તેમણે રોકી. કારની પાછલી સીટમાં બાપુ બેઠા હતા. બાપુએ કહ્યું : “સાહેબ! કાળી કામળી તમારા માથા ઉપર ફેરવું?’’

બાપુ! કાજળ કોટડીમાં એટલે કે લૉકઅપમાં અને જેલમાં કાળી કામળી ફેરવવાનો તમને સતત મોકો મળશે! તમે તમારા માથા ઉપર જ ફેરવ્યા કરજો!”

પોલીસે બાપુને એરેસ્ટ કર્યો. પોલીસે પુછયું : “ગણેશ! લોકો તારા કાર્યક્રમમાં ઉમટી પડતા એનું કારણ?’’

“સાહેબ! ઈશ્વરને પ્રાર્થના કરવા છતાં સારું થતું ન હોય, મનોકામના પુર્ણ થતી ન હોય ત્યારે દુઃખી વ્યક્તીઓ; ભુવાઓ, બાવાઓ, બાપુઓ, પાખંડીઓ પાસે આવે છે! એમની શ્રદ્ધા ટકાવી રાખવા નાટક કરવું પડે!’’

“કેવું નાટક?’’

“સાહેબ! જ્યાં હું કાર્યક્રમ યોજતો ત્યાં આગલી રાતે ત્રણ ટ્રકમાં અપંગો, રોગીઓને હું ઉતારી દેતો. એ બધાં મારા માણસો! સારું થઈ ગયાની વાતો કર્યા કરે! ભોળા લોકો જાદુઈ કાળી કામળીનો ચમત્કાર માને!’’

–રમેશ સવાણી

‘સંદેશ’ દૈનીકમાં પ્રગટ થતી એમની રૅશનલ કટાર ‘પગેરું’(26, ઓક્ટોબર, 2016)માંથી.. લેખકશ્રીના અને ‘સંદેશ’ દૈનીકના સૌજન્યથી સાભાર…

લેખક સમ્પર્ક :  શ્રી. રમેશ સવાણી, I.G.P.

10-Jatin Banglo, B/h-Judge’s Banglo, Police Choki, Bodakdev, Amdavad – 380 054 Mobile : 99099 26267  e.Mail : rjsavani@gmail.com

 

Advertisements

24 thoughts on “જાદુઈ કાળી કામળી!”

  1. It is a nice article with full of truth and facts. It is an eye opening article. In India uneducated and desperate people become victim of these gurus.

    Thanks so much for this article.

    Pradeep H. Desai
    USA

    Liked by 1 person

  2. જો તમે બુદ્ધિજીવી હો અને કમાતા હો તો ઈન્કમ ટેક્ષ લાગે છે. જો બુદ્ધિ ન હોય તો મૂર્ખતાનો (લોટરી ટીકીટનો) ટેક્ષ લાગે. જો તમે અંધશ્રદ્ધા રાખતા હો તો આવા બાવાઓ તમારી ઉપર ટેક્ષ લગાવે.

    Liked by 1 person

  3. સ્નેહી શ્રી ગોવિંદભાઇ,
    લાખો લાખો આભારની અભિવ્યક્તિ અત્રેથી દર્શાવું છું. આના જેવાં પ્રેક્ટીકલ લેખો કાયમ રજૂ કરો. ખુબ જ સુંદર કર્મ થયું છે. તમારો ખૂબ ખૂબ આભાર.
    બીજું હ્યુમેનીસ્ટ રેશનાલીસ્ટ અેસો. ના જાગૃત સંતશ્રી મુકુન્દરાય કરસનદાસ સીંઘવનો જેટલો આભાર માનીઅે અેટલો ઓછો છે.તેમણે ઘીરજથી મનોબળ થકી સત્યને ઉજાગર કર્યુ છે. તેઓ સાચા અર્થમાં સંતપુરુષ છે. તેમને માટે લોકસેવા કે સમાજસેવા જ જીવનઘર્મ બની ગયા છે. પેલાં ઘાર્મિક પ્રવચનોના વાતોના વડા કરનારાઓ જે પોતાને સંત કહેવડાવે છે તેઓ પણ કદાચ પોતાના ખાંઘીઆ રાખતા હશે કે જેૉ તેમનાં વેપારની અેડવર્ટાઇઝમેન્ટ કરતાં હોય તેવું પણ બને. સચ્ચાઇની તો મને ખબર નથી.. પણ ખરાં ખોટા વિચારો મગજમાં પ્રવેશી જાય છે…ખરું ખોટું તો તે આખ્યાનકારો પોતે જ જાણે. અખાઅે તો ક્યારનું કહેલું છે કે….પેલા સસરા અને વહુ…કથા સાંભળવા ગયા….( ? ) મુકુંદરાયે કરેલી સેવા ઉગી સમાસેવાના ઉત્તમ પરિણામરુપે…. ડો. વીપુલ અગ્રવાલજીને પણ લાખો પ્રણામ. મને અાશ્ચર્ય થયું કે અેક ડૉક્ટર અને પોલીસવડાની ખુરસી શોભાવે ? પ્રણામ….
    ગોવીંદભાઇ, આવા પ્રક્ટીકલી પ્રુવ થયેલાં દાખલાઓ વાળા આંખ ઉઘાડનારા લેખો જરુરથી લોકસેવા કરશે. થીયરીવાળા લેખો તે શુભ પરિણામ નહિ આપે જે પ્રેક્ટીકલી પ્રુવ લેખો આપે.
    સૌથી વઘુ આભાર માનવો રહ્યો…. ૩૨ વરસની યુવાન વયના સ્નેહી રાજીબેન ભરવાડનો. તેમની હિંમતને બીરદાવીઅે. ૩૨ વરસના રાજીબેને પોતાની હિંમતથી હજારો ઘરોમાં રાજીપો પાથરી દીઘો. તે સાચા અર્થમાં અેક દેવી સ્વરુપ માતા છે. તેમને ‘હેપી મઘર્સ ડે‘ ચાર ચાર દિકરીના મા રાજીબેનને પ્રણામ. દિકરાની લાયમાં પત્નિને મારનાર રાક્ષસને તેમણે મહાત કર્યો છે…રાજીબેન સાચા સ્વરુપે દેવી છે.
    શ્રી મુકુંદરાયને અને દરેક સાથીઓને પ્રણામ અને તેમનો અાભાર.
    અમૃત હઝારી.

    Liked by 3 people

    1. વહાલા અમૃતભાઈ,
      આપશ્રી તેમ જ ‘અક્ષરનાદ’ વેબસાઈટના સંચાલક શ્રી. જીજ્ઞેશભાઈ અધ્યારુ, શ્રી. નવીનભાઈ નાગરેચા, શ્રીમતી પુર્વીબહેન કુણાલભાઈ શાહ, શ્રીમતી સંગીતાબહેન પાંડે, શ્રી. ગાંડાભાઈ વલ્લભભાઈ પટેલ, શ્રી. કરસનભાઈ ભક્ત તરફથી તેમ જ વાચકમીત્રો તરફથી ફોન પર મળેલા સુચનોને ધ્યાનમાં લઈ, દર બીજા અને ચોથા શુક્રવારે શ્રી. સવાણીસાહેબની કૉલમ ‘પગેરું’ના લેખો ‘અભીવ્યક્તી’ બ્લોગ પર મુકવા હું વીનમ્ર પ્રયાસ કરીશ.
      તમામ પ્રતીભાવકમીત્રો તેમ જ અમને ફોન કરીને બળ અને પ્રોત્સાહન પુરું પાડનારા વાચકમીત્રોનો તહે દીલથી આભાર…
      ..ગોવીન્દ મારુ

      Liked by 1 person

  4. સત્ય મેવ જય તે …… અમૃતકાકા એ ઘણું બધું એમની ટૂંકી ટિપ્પણી માં કહી દીધું. હા એક સલામ જરૂર રાજી બેન માટે ….. કાશ રાજીબેન જેવી નારી આપણા સમાજમાં સમાજ ને બચાવવા આગળ આવે…

    અહીં બીજી વાત એ આવે છે કે જ્ઞાન અને ભણતર જે આપણ ને સારી અને સાચી સમજ આપે છે એ આગળ પડે છે. ગામડા ના અભણ અને પીડિત લોકો માટે આવી કાળી લાકડી ઊંડા ખાડા ખોદી ખીડી ને એમાં દાટી દે છે જે આપણે જ્ઞાન-વિજ્ઞાન થી અટકાવી શકીયે …..

    Liked by 2 people

  5. “ઝૂકતી હે દુનિયા,ઝૂકાને વાલા ચાહીયે”

    આવા લેભાગુઓ લગભગ દરેક ધર્મમાં અસ્તિત્વ ધરાવે છે.

    ઉત્તર અમેરિકા જેવા પ્રગતિશીલ દેશ માં પણ ટેલીવીઝન પર આવા લેભાગુઓ જોવા મળે છે. પૈસા આપીને ટેલીવીઝન પર સમય ખરીદીને ભોળા લોકોને મૂર્ખ બનાવે છે.

    જો જનતા માં જ જાગ્રતિ ન હોય, તો આપણે રેશનાલીશ્ટો શું કરી શકીયે?

    કાસીમ અબ્બાસ

    Liked by 2 people

  6. હાલમાં જ મેં મારા બ્લોગ “સુરતી ઊંધિયું”માં એક ફોટો મુક્યો હતો જેમાં પૃથ્વીના ગોળા(રમકડાનો) ઉપર મોરારી બાપુ અને બીજા સંતો પાણીથી પૃથ્વીને ઠંડી કરતા હતા. આમ કરવાનું કારણ કે એને લઈને પૃથ્વી પરની ગરમી ઓછી થઇ જશે. બધા મોટી મોટી વાતો કરે છે કેમ કોઈએ આ બધા સંતો સામે દેખાવો નહિ કર્યા? મુકુન્દરાય અને રાજી બેનને અભિનંદન!

    Liked by 1 person

  7. પ્રજા જાગૃત થાય તો જ પાખન્ડ નો સર્વનાસ થાય.
    પ્રવિન કુમાર પટેલ

    Liked by 1 person

  8. ગોવીંદભાઈ, હાર્દીક અભીનંદન. ખુબ સરસ આર્ટીકલ શોધી લાવ્યા. આ પ્રકારના સાબીત થયેલા પાખંડના કીસ્સાઓ જેમ બને તેમ વધુ પ્રમાણમાં પ્રકાશમાં આવે તે અંધશ્રધ્ધાળુ લોકોની આંખ ઉઘાડવા માટે જરુરી છે. તમે આ રીતે સમાજની ઘણી સુંદર સેવા કરી રહ્યા છો. આભાર ગોવીંદભાઈ.

    Liked by 2 people

  9. આ અન્ધશ્રદ્ધાળુઓની ગાંડી માથાભારે જમાત સામે મુક્ન્દરાય જેવા જવામર્દનું જ કામ..!! એમણે આરપારનો જંગ ના છેડ્યો હોત તો નિઃસહાય નિર્બળ ચાર ચાર દીકરીઓ સાથે ત્યકતા રાજીબેનનિ કેવી હાલત થતે ??
    આવા તાજા વર્તમાન કિસ્સાઓનો ઢાંક્પીછોડો ના થવો જોઈએ. પરંતુ જાહેરમાં લાવી જે જે લોકોના મગજ ફક્ત આવી અન્ધશ્રદ્ધા અને ગેરમાન્યતાથી ભરેલા છે તેઓને પણ સાવધ કરી જાગૃત કરવા જોઈએ, જો એ જંગલી લોકો સમજે તો. માનું છું કે એવા લોકો આવી જાગૃત કરનારી વાતો વાચતા જ નહિ હોય.

    Liked by 2 people

  10. मने लागे छे के वाचकमित्रो ए वधु पडती शाबाशी अने प्रशंसा करी छे। में तो मारी रेशनल फरज बजावी छे। हा, अामां मने घणुं वेठवानुं अावेल खरुं, पण ए तो फरजना भाग तरीके स्वीकार करवो ज पडे । सेो मित्रोनो अाभार ।

    Liked by 2 people

  11. मारा उपरान्त अमारी टीम ना रमेशभाइ त्रिवेदी, जयेशभाइ श्रिमालि,अविनाशभाइ मिस्त्री, डॉ. माह्यावंशी साहेब तथा डॉ. वलि साहेब नो पण फाणो हतो। परन्तु पोलिस फरियाद अने कानूनी कार्यवाहीमां में अग्रेशर भाग भजवेल होवाथी तेम ज सामे पक्षेथी पण मारा उपर कार्यवाही करेल हती, बाकी आ पर्दाफाश करवामां अमारी पुरी टिम सक्रिय हती।

    Liked by 2 people

    1. વહાલા અરવીન્દભાઈ,
      ‘જાદુઈ કાળી કામળી!’ લેખને આપશ્રીના બ્લોગ પર ‘રીબ્લોગીંગ’ કરવા બદલ ખુબ ખુબ આભાર..
      આપની તબીયત જાળવજો..
      ..ગો. મારુ

      Like

  12. Govind bhai,

    I kept ‘Jadui Kaamli’ on Apna Adda (Gujarati) FB page today. People started responding.

    Regards.

    Firozbhai.

    ________________________________

    Liked by 1 person

    1. વહાલા ખાનસાહેબ,
      ‘સાકરીયા બાપુ!’ લેખને ‘अपना adda’ પર જનજાગૃતી અને ચર્ચા અર્થે શેર કરવા બદલ ખુબ ખુબ આભાર..
      ..ગો. મારુ

      Like

  13. I congratulate the author of exposing this nuisance of witchcraft and fraud by a scamster which continues even in modern days of science, logic and governance of a professional political party !!! Bharwad scamster was playing this game since 2005 , detected in 2009, investigated in 2010 and arrested in 2011!!!!! Is this a fast pace of administration !!!!!
    I fail to understand how a administration, police and media allowed such a scamster to carry on his witchcraft for such a long time !!!! has there been no investigation by administration when such gathering happens in open public glare !!!! Every now and again such news of fraud flare up and administration keeps sleeping !!! I blame political leadership and police administration of either complicity or negligence !!! Wish we really live upto 21 st century when man travels in space and controls digital world !!!!

    Liked by 1 person

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

w

Connecting to %s