આસ્તીકના ઉકાળા

પાપ–પુણ્ય, સ્વર્ગ–નર્ક, મોક્ષના કરે દાવા,

સ્વર્ગ–નરકનાં ક્યાં જંક્શન, કહેશે કોઈ બાવા?

 

કંઠી બાંધી, કાન ફુંકી, સુગુરા કર્યાના દાવા,

બ્રહ્મ–સંબંધમાં બખેડા, ઘણા હકના કરે દાવા.

 

થાંભલે–થાંભલે દાઢી, દાઢીએ દાઢીએ બાવા !

બ્રહ્મચર્યના નીયમ ખોટા, ખોટા શક્તીપાતના દાવા.

 

ટીલાં તાણી, માળા ફેરવી, ગૌમુખીમાં ગોટાળા,

ધોતી, લંગોટ, જનોઈ પહેરી, ગજબ વાસનાવાળા!

 

મુખ જોવાથી પાપ લાગે, અડે કરે ઉપવાસ,

મોકો મળે મુકે નહીં, કાળાં કરમ કરનારા 1

 

દાન નહીં કરે, નરકે જાશે, વાતોના કરનારા,

પારકા રોટલા, પારકા પૈસા, કયા નરકે જાશે બાવા ?

 

‘પુણ્ય અહીં કરે, પ્રભુ ઉપર આપે’, વાયદાના કરનારા

કહો: ‘અહીં આપ્યું, અહીં આપો’, તો ભાંગી પડશે બાવા !

 

બાળપણમાં દીક્ષા આપે, ને મુંડી નાખે માથાં,

વર્તમાનની વાસ્તવીકતા સામે, ટકે ન આવા બાવા !

– ખીમજી કચ્છી –

 

એ–38, સંત જલારામ સોસાયટી,

પંડોળ એસ્ટેટ સામે,

વેડ રોડ, સુરત–395 004–ભારત

Mobile-98251 34692